Ogg, John
Cam ye by e kirk on Sunday?
Saa ye yon fine ledddy in er goon
Listening tae e kist o fussles
Playin oot sweet Crimond's tune?
Cam ye by e wids on Sunday?
Saa ye e watters sweetly play?
Heard ye e foowls up in e lift
Sing eir sangs o praise aa day?
Cam ye by e hills on Sunday?
Saa ye ere e hind an stag?
Heard ye e burnie saftly tinklin?
Saa ye a poacher wi his bag?
Cam ye by e cots on Sunday?
Saa ye e cottars' bairnies play?
Saa ye ere auld Scotland's future
Fowk arisin fae e cley?
Cam ye by e shore on Sunday?
Saa ye waves o saaty faem?
Saa ye e wrinkled fishermen
Mendin nets nae far fae hame?
Cam ye by e isles on Sunday?
Saa ye e kelp an bladder wrack?
Smelt ye e warm Atlantic's tangle?
Saa ye caves baith weet an black?
Cam ye by yon toon on Sunday?
Saa ye faces forjeskit, sad;
Sowlless, despairin, broken-hertit,
Ceevilisation gaein mad?
Cam ye by Scotia's lan on Sunday?
Saa ye e crafters it eir toil,
Makin a leevin oot o naething
Poorin swyte intae e soil?
Cam ye by e yird on Sunday?
Saa ye ere e meltin snaa,
E mountain glaciers recedin,
E polar ice begin tae thaa?
Cam ye by e kirk on Sunday?
Saa ye chapter, saa ye verse?
Saa ye e meevin finger vreetin
E ferlies o e universe?