University of Aberdeen Takes you to the main page for this section
Elphinstone Kist   Stories for Bairns

Brockit an the Tail o Moses     by: Wheeler, Les

Sandy an Bess wir the twa fermtoon dogs an they were eesed tae the ither beasts on the ferm. Brockit seen got tae ken them baith an aften jined them tae hae a suppie milk fae the same bowlie.

Brockit hid ae wee game he likit tae play wi Sandy an Bess. That wis tae try an catch the tail o the dog as it moved back an forrit. Jist eence or twice he wid be a bittie too forcey wi his claws an a queer-like lookie fae Sandy or Bess wid remind Brockit tae caa canny. Nae that it happent verra aften cos the dogs fair likit the wee strippit kitlin.

Noo, ae day the fermer an his wife got a visit fae the meenister an the meenister’s wee Scottie dog. Fan the meenister, Mr. Robertson, arrived his dog, Moses, wis let oot o the car an gaen a bowlie o milk.

Brockit saw the two strangers arrivin an thocht he wad jist gyang an see fit wis gyan on.

Noo, Moses wisna as eesed tae ither beasts as Sandy an Bess an fan Brockit’s heid an then his wee pink tongue appeared at the milk dishie Moses wis a wee bit put oot. But, seein that he wis the meenister’s dog, he jist tholed an said naething.

Haein feenisht his drink, Moses lay doon on the grun, shut his een an thocht aboot fativer it is dogs think aboot. Efter twa-three meenits his wee tail began tae swish an swash back an forrit.

“Oh, ho!“ thocht Brockit, “the wee black doggie is needin tae play a game.“

Brockit took a great muckle loup in the air an landit, claws oot, richt on tap o the wee dog’s back. Brockit hid forgotten that the wee dog hid verra little in the wye o a tail an he loupit ower far.

Moses let oot a howl an a yelp. Ye wid hae thocht the verra deevil himsel wis efter him. He swung aboot an took a muckle snap at Brockit. Brockit didna hing aboot. He wint stracht up the nearest gean tree an there he bade till Moses an the meenister hid left.

Brockit noo kent that aa dogs are nae the same an that it wis wise tae steer clear o fowk fa werna verra fond o ye until ye kent them better.

© University of Aberdeen   Return to Home page