University of Aberdeen Takes you to the main page for this section
Elphinstone Kist   Maakers, History, Education

The Empty Playground     by: Rich, Lilianne Grant

Faur hiv aa the bairnies gane?
The playground girse is lang and green
Faur aince ye nivver saw a blade —
Nae chance tae growe fin bairnies played!

They’ve closed the skweel aside Knowheid
Faur aince I won my daily breid;
It roogs my very hert to see’t —
Nae lauchin bairns, nae dancin feet.

Fyles as I tak a dander roon
Fin stars wi benison look doon
I mind on ilka treasured bairn
Wha sat within yon waas to learn.

Aneth the bell’s auld iron croon
Throu the lown nicht there wafts a soun,
A soun ower sweet for hoolet’s cry
Or nowt-beasts fae the ferm owerbye.

And fae the shadows jinkin there
As if in answer to my prayer
Sure’s daith! There’s fyles I hear and see
Phantom bairnies dance in glee.

© University of Aberdeen   Return to Home page