Robertson, Stanley
Wis it the I floories bloomin on mi windae sill,
Or the burnie rinnin doon the hill,
Or the rainbow like an oil spill,
That made mi day sae happy?
Fit wis it?
Wis it the doggie barking ower the lea,
Or the salmon louping on the Dee,
Or the poodery smooderich drookin me,
That made mi day sae happy?
Fit wis it?
Wis it the young loon deliverin milk,
Or the bonnie wee quinie dressed in silk,
Or the orra lad in a unca ilk,
That made mi day sae happy?
Fit wis it?
Wis it the auld bussie bobbin up and doon
Takin folks intae the toon
Or the mairket droves gaun their roon
That made mi day sae happy?
Fit wis it?
Wis it the auld couple huddin hands
And rememberin thochts aboot the land
Their love remainin throughoot the stand
That made mi day sae happy?
Fit wis it?
Wis it the minister giein a wave,
Or the boys playin fitbaa the goal he did save
Or the big muckle pair being driven by Dave
That made mi day sae happy?
Fit wis it?
Wis it mi wife I met on the road,
Wi the bairnies aa singin oot loud
That cheered up mi heart as I trodged on mi toad
That made mi day sae happy?
I kent fit it wis!