Wheeler, Les
Brockit bade near his mither for a day or twa efter he got drookit in the pond, but he seen got ower his fricht an eence mair steppit oot intae the big world o the ferm.
Noo, Brockit spent a lot o time lookin at aathing an aabody, but naebody lookit near him. Och, een or twa o the ferm beasts wid hae noddit or said somethin tae een anither aboot the ferm cat's kitlins being up an aboot, but nae muckle mair.
Weel, thir wis a bittie o win this day an Brockit wis jist a wee bittie feart o it at first. But eence he seen that it wid dee him nae hairm he got tae enjoyin it.
Fit he really likit aboot it wis the wye it blew the feathers aa ower the place. The hens, an deuks an bubbly-jocks on the ferm wid drap feathers every noo an again an the win wid blaw them aboot the yaird ootside the barn.
Brockit hid a grand time tae himsel chasin them up an doon an roon and roon in circles. He wis breengin, an gallopin, an loupin, an skitin fan aa o a sudden some gie queer-like feathers appeared fae naewye!
This eens wir fite wi bitties o black, an hid legs (tho only twa!) an they gaed a funny kind o "cheep-cheep" aa the time they wir rinnin about. Forbye that, they jinkit aboot an affa lot an Brockit thocht that they were rare fun an he set aff chasin them aa ower the yaird.
Noo, Brockit wis sure that this wis as grand a game as he could play, but the mither bubbly-jock (for it wis her bairns Brockit wis chasin) didna seem tae think it wis aa that funny. She spied Brockit chasin her wee bairns and she set aff tae chase Brockit.
Wi a gobble-gobble-gobble, an a frussle o feathers, an a swachin o wings, mair gobble-gobble-gobble, an a muckle stabbin o her beak the bubbly-jock wis efter Brockit. Brockit hid tae really rin tae get awa fae the bubbly-jock.
Wee!, the mither bubbly-jock only hit Brockit eence, but the sherp stab at Brockit's heid wis anither lesson for the wee kitlin. Some mithers hae a different idea o fun fae bairns, an it's as weel tae bide wee! awa fae mithers fan thin lookin efter thir wee bairns.