Thinkin Aheid

Gaffron, Aileen

Fin I am deid I'd raither be
Awa in the hills aneth a Hielan sky
Wi heather an girse an granite cliffs aroon
An a peat-stained loch nearby.

Bit if in a city cemetary I maun lie
Wi tenement waas, nae rocks abeen
Insteid o birdsang, jist the traffic's din
I'll still be happy, if I hae for company
Fowk that kent o Scotland lang ago
That unnerstood the wyes o beasts an men
Lang forgotten ballants an aal lullabies.