University of Aberdeen Takes you to the main page for this section
Elphinstone Kist   Doric Verse

Puddle in a Peel     by: Scardogan

Tho’ bairns hae a hunner toys
Expensive tae as weel
They’ll cast the hale ging bang aside
Tae puddle in a peel

Nae metter tho’ the peel be fu’
o’ goor fae washin’ tubs
They’ll tramp her up an’ doon wi joy
Tae get her intae dubs

I min fan I wis jist a loon
An’ gaen tae the squeel
Foo wi rolled wir breeks up ower wir knees
An’ puddled in a peel

At that time we’d nae wellie beets
Maist aften neen ava
Excep’ fan frosty mornin’s cam’
An’ sna begood tae fa’

At the gate o’ een o’ Watteries parks
Far cairts wi iron wheels
Hid howkit oot a clorty rut
An turned them intae peels

There easy wis a fit o’ dubs
An’ fool kine on the claes
Bit fut a great sensation
Squelchin dubs thro’ a’ yer taes

Wi’ didna puddle ilka rut
Na na we wir na feel
We keepit een tae clean wir feet
Sine roadit for the squeel

Tho’ bairns hae a hunner toys
Expensive tae as weel
They’ll cast the hale ging bang aside
An’ puddle in a peel.



© University of Aberdeen   Return to Home page