University of Aberdeen Takes you to the main page for this section
Elphinstone Kist   Doric Verse

Trumpie     by: Ogg, John

Day dawin
Cock crawin
Birdies tweetin
Yowies bleatin
Lift brichtenin
Mist shiftin
Spume driftin
Wavies braakin
Wand awaakenin
Fishies sweemin
Looers dreaming;
Ferlies aa;
An me aleen
Puir an caul
Wioot a hame
Waatchin Venus
An e risin sin
Winnenin fit aa
E day wull bring;
On e road
Praisin God
Wi mi pack
On mi back
A waanerin chiel
Nae a feel
Oot o schweel
Bit fouthy
I e neist life
Wrntin naethin
Bairns or wife
Trock on gear
Hakein wioot fear
Fower sizzons
O e ear
Harkenin unta e vyce
O e greenin lan
Warkin files
For mi maet
Mendin pans
An shairpenin blades
O scythe an saa
An spaad;
Fit gart mi wanner
Neen cin tell
A’ll traik tae hivven
Or aiblins hell
Wytin mi turn
Wi beasts an chiels
For Daith tae chap:
E fisher wi his creels
An plooman wi his coulter
E fouthy an e gran
E miller an his mouter
Aa tak e een wye —Puirlik sowls
Seen happit ower
Wi sods an mools;
Bit noo A traivel
Ower e yird
Wie scouth
O ilkie bird
Wytin for e day
Fan e Lard
Wull caa mi hame;
A boo afore nae man
Nae heepie maks mi craal;
A am a trumpie
On e windin road
Poortith is mi billet
Teemlik is mi wallet
Sorras hae A neen
Is A lig aneth
E siller meen
I e soughin win;
Sae sall it be
Untae mi en
An birdies sing
Mi lest Amen;
Syne wull A stairt
Mi lest lang traik
Amang e hamely starns.



© University of Aberdeen   Return to Home page