|
Foghlam tro Mheadhan na Gàidhlig
Ullachadh airson Foghlaim tro Mheadhan na Gàidhlig ann am
prògram PGCE(Bun-sgoil) Oilthigh Obar Dheathain.
Feallsanachd
A chionn ’s gu
bheil àireamhan nan sgoilear a tha a’ sireadh foghlaim tro
Ghàidhlig a’ sìor dol am meud, tha an tuilleadh iarrtais
ann airson luchd-teagaisg a tha comasach air clàr-teagaisg na sgoil
àraich agus na bun-sgoile a theagasg tro Ghàidhlig. Tha
an tuilleadh iarrtais ann airson luchd-teagaisg a tha sgileil sa chànan,
fileanta agus misneachail, gach cuid ann am bruidhinn agus ann an sgrìobhadh
na Gàidhlig, agus mothachail air cho cudromach ’s a tha cultar
na Gàidhlig.
Taghadh
Tha Oilthigh Obar
Dheathain a’ dèanamh fìor oidhirp gus taic a chur ri
Foghlam tro Ghàidhlig ann an Tùs-thrèanadh Thidsear.
Tha sgeama sònraichte air a chur air bhonn, le àireamhan
oileanach a thathar ag amas togail, an co-chomhairle ris na h-ùghdarrasan
foghlaim ionadail. Tha ceangalaichean gan neartachadh le Roinn na Ceiltis
gus na h-oileanaich aig am bheil ùidh ann an teagasg tro Ghàidhlig
aithneachadh agus a chomhairleachadh. Feumaidh a h-uile neach a tha a’
cur a-steach iarrtais airson teagasg tro Ghàidhlig sa phrògram
PGCE(Bun-sgoil) thighinn gu agallamh. Tha na h-agallamhan ann an gach
cuid Gàidhlig agus Beurla, agus tha pìos sgrìobhaidh
ri dhèanamh sa Ghàidhlig,
Thathar a’ dùileachadh gun lean iadsan a tha soirbheachail
san agallamh Cùrsa Foghlam tro Ghàidhlig anns a’ phrògram
PGCE(Bun-sgoil).
Tha dà eileamaid
anns a’ chùrsa thaghte:
- leasanan a’
chùrsa Foghlam tro Ghàidhlig
- greis teagaisg
ann an clasaichean/sgoiltean Gàidhlig
An Cùrsa Taghte: Foghlam tro Ghàidhlig
Susbaint agus Structar
Tha an cùrsa
seo air a stèidheachadh air dà adhbhar bhunaiteach:
- ur fileantachd
ann an còmhradh agus ur sgilean sgrìobhaidh anns a’
Ghàidhlig a leasachadh
- ur sgilean ann
a bhith a’ teagasg a’ chànain gu h-iomchaidh anns a’
bhun-sgoil a leasachadh.
A thuilleadh air a
bhith a’ toirt sùla air an obair leasachaidh a tha a’
dol air adhart an-dràsta ann am Foghlam tro Ghàidhlig, bidh
cothrom agaibh ionnsachadh mu bhith a’ liùbhairt diofar chuspairean
air a’ chlàr-theagaisg tro mheadhan na Gàidhlig.
Anns a’ chùrsa
seo tha 20 uair-a-thìde de theagasg agus 30 uair-a-thìde
de dh’obair air ur ceann fhèin. Bheir am modail seo dhuibh
cothrom:
- ionnsachadh mu
eachdraidh agus mu obair leasachaidh an là ’n-diugh ann
am foghlam Gàidhlig na bun-sgoile le taic ga chur ri bhith a’
cleachdadh sgilean mheasaidh agus bhreithneachaidh gus an ceangal eadar
feallsanachd agus teagasg a sgrùdadh;
- ur comas ann an
Gàidhlig a leasachadh gus misneachd agus eòlas cànain
a thoirt dhuibh gus am bi sibh comasach an clàr-teagaisg a liùbhairt
tro mheadhan na Gàidhlig;
- ur sgilean sgrìobhaidh
pearsanta a leasachadh;
- mothachadh a bhith
agaibh air dòighean teagaisg a tha freagarrach airson luchd-ionnsachaidh
òg na Gàidhlig, gu sònraichte feallsanachd agus
sgilean pragtaigeach teagaisg co-cheangailte ri drùdhadh anns
a’ chànan;
- briathrachas airson
diofar chuspairean air a’ chlàr-theagaisg ionnsachadh;
- measadh a dhèanamh
air stuthan teagaisg a thathar a’ cleachdadh ann an roinnean sònraichte
den chlàr-theagaisg ann an clasaichean Gàidhlig agus aig
an aon àm fiosrachadh fhaighinn mu eachdraidh litreachas na h-ìre
seo;
- misneachd fhaotainn
gus ur cuid stuthan fhèin a chruthachadh airson diofar chuspairean
air clàr-teagaisg nan clas Gàidhlig agus na th’ ann
de stòras Teicneolas Fiosrachaidh agus Conaltraidh a chleachdadh;
- ullachadh fhaighinn
airson a bhith a’ teagasg nan diofar ìre ann am bun-sgoil
Ghàidhlig.
Dòighean Teagaisg
Bidh fìor chudrom
air ionnsachadh tro dhrùdhadh, a’ cumail ri eileamaidean a
chuidicheas an sgoilear òg a chuid sgilean èisteachd, còmhraidh,
leughaidh agus sgrìobhaidh a leasachadh. Tro na h-eileamaidean,
bithear a’ coimhead gu dlùth ri eòlas air structar
a’ chànain. Tron chùrsa bidh cudrom air puingean cumanta
agus cudromach gràmair ionnsachadh agus a chleachdadh gus am bi
na h-oileanaich misneachail ann an teagasg Gàidhlig do sgoilearan
òga. Tha na dòighean-teagaisg stèidhichte air teagasg
na Gàidhlig gu h-èifeachdach, agus ’s e prìomh
amas nan eileamaid gun leudaich ur mothachadh agus ur misneachd le taic
bhon neach-teagaisg san oilthigh.
Foghlam fosgailte
Fhad ’s a bhios
sibh ag obair gu neo-eisimeileach, thathar a’ dùileachadh
gun dèan sibh mion-sgrùdadh air Stiùireadh Nàiseanta
Gàidhlig 5-14, gun dèan sibh sgrùdadh air stuthan
teagaisg an là ’n diugh, gun cruthaich sibh ur stuthan pearsanta,
a’ taisbeanadh gu pragtaigeach ur comas anns a’ Ghàidhlig
agus ur mothachadh air na h-ìrean aig a bheil a’ chlann dom
bheil sibh a’ deasachadh stuthan. Thèid iarraidh oirbh planaichean
leasain a chruthachadh agus a lìonadh a-steach anns a’ Ghàidhlig,
a rèir molaidhean 5-14, agus pasgain briathrachais a gheibh sibh
a sgrùdadh m.e. Spòrs, Eòlas Arainneachd, Matamataic,
s.m.s.a.a.
Eòlas Sgoile
Tha ceangal aig ionnsachadh
san oilthigh ri eòlas sgoile tro na greisean a bhios na h-oileanaich
a’ teagasg ann an sgoiltean far am bithear a’ dùileachadh
gun gabh an t-oileanach, mean air mhean, uallach airson a bhith a’
liùbhairt clàr-teagaisg na bun-sgoile tro mheadhan na Gàidhlig.
Bidh dà ghreis teagaisg aig na h-oileanaich ann an clasaichean
Gàidhlig, aon ghreis le Irean Arda na bun-sgoile agus a’ ghreis
eile leis na h-Irean Oga. Mar is trice, bidh luchd-teagaisg bhon oilthigh
a’ tighinn a mheasadh an oileanaich, agus bidh co-dhiù aon
den luchd-teagaisg sin aig am bheil Gàidhlig. Far nach gabh seo
dèanamh, thèid am measadh a dhèanamh le aon neach-teagaisg
bhon oilthigh agus neach obrach bhon ùghdarras ionadail. A thuilleadh
air na sgrìobhainnean coitcheann airson eolas sgoile a thathar
a’ cur gu ceannardan sgoile agus gu tidsearan, thèid comhairle
a tha a’ bualadh gu sònraichte air greis teagaisg tro mheadhan
na Gàidhlig a thabhann do sgoiltean agus do oileanaich.
Ceangalaichean ri Eòlas Sgoile
Tha ceangal aig a’
chùrsa seo ri eòlas sgoile gu sònraichte ris na greisean
a bhios an t-oileanach ag ionnsachadh teagaisg ann an sgoil far am faigh
an t-oileanach cothrom leasanan a liùbhairt tro mheadhan na Gàidhlig.
Bidh e cudromach don
oileanach, tron phrògram PGCE(Bun-sgoil) air fad, a bhith a’
cnuasachadh air mar a ghabhadh leasanan a tha air an liùbhairt
tro mheadhan na Beurla a lìbhrigeadh a cheart cho èifeachdach
tro mheadhan na Gàidhlig.
Cuirear luach air
na dh’innseas an t-oileanach mun fhiosrachadh a fhuair e no i rè
nan greisean sgoile mar thobair de chomhairle phragtaigeach don neach-teagaisg
a tha ag ionnsachadh na dreuchd.
|
